حكايه عم سيد منذ اعتقاله يوم 1 اغسطس"رمضان" لخروجه 3 اغسطس"رمضان"

البدايه مع هجوم قواتنا المسلحه ومن وراها الامن المركزى ع المعتصمين فى الميدان لتطهيره من البلطجيه على حد قول المجلس العسكرى وحكومة شرف ... عم سيد اتمسك قدام مجمع التحرير وقعوه ع الارض وكتفه ايديه ورا ضهره وحطوه فى المدرعه وهو فى المدرعه شاف الجيش وهو بيقتحم مسجد عمر مكرم وبيقول ان اللى كان بيجرى ويقع الشرطه العسكريه كانت بتدغدغه المهم بعد ما مسكوهم رحلوهم على س5 فى عابدين وهناك فضلوا قاعدين لحد الساعه 8 مساءا والناس اللى صايمه ماحططش حاجه فى بؤها وبعد كده رحلوهم ع السجن الحربى فى ميكروباصات بتشيل 15 واحد كانوا بيركبوا فيها بال 40 واحد ,كان فى ناس بتنذف فى الميكروباص فكانوا بيستنجدوا بالظابط عشان ينزل الناس اللى بتنزف دى عشان ماتموتش الظابط كان بيرد عليهم ويقولهم خليهم يموتوا واحنا لما يموتوا هنعملهم تصريح دفنه وهنزلهم ع القبر .. المهم وصلوا السجن الحربى نزلوا من الميكروباصات زحف لحد ما وصلوا للبوابه واللى كان بيرفع راسه كان بيضرب عليها بالعصيان وهو اخد ضربه فى دماغه ورمتهاله لما وصلوا ع البوابه واحد كان بيكلم ظابط وبيقولوه انتوا بتعملوا فينا كده ليه هو انتوا بتحمونا ولا بتحموا مبارك رد الظابط "من واجبنا حماية مبارك والسيد المشير" المهم ضابط كان بيسأل عم سيد انت شغال ايه قاله انا تاجر سمك من السويس راح الظابط قاله يعنى نقول بلطجى وصايع !! عم سيد بيقولنا ان كل اللى هناك كانوا طلبه وكان فى اعلاميين وكمان كان فى اطفال قصر وبيقول "انهى قانون فى العالم يخلى اطفال يدخلوا السجن الحربى". كانوا موقفينهم وملقعينهم هدومهم كلها كانوا لابسين الشورت بس حبه حبه يدخلوا جوه حجره بيضربه بالعصيان والكهربه والبياده واللى كان واقف مستنى دوروه بره كانوا بيتسلوا عليهوبيضربوه بالبوكس فى زوره. عم سيد رجليه الاتنين متدغدغين وبيمشى عليهم بالعافيه وفى جزع فى ايده الشمال وبيقول انهم كانوا بيكهربوهم فى اماكن حساسه والضرب بالبياده بيبقى فى السمانه والعضله الخلفيه لحد ما يخدروهم من الضرب بيطلعوا من الحجره دى وبياخدوا هدومهم بعد ما بيفضوها من كل حاجه حتى رباط الجزم كانوا بيخدوه. دخلوا على المستشفى واللى كان مصاب كانوا بيكتبوا سليم عشان يترمى فى السجن وكمان كانوا بيمضوهم على اقرارات انهم ماعندهمش امراض مذمنه يعنى سكر او ضغط .. الخ مع ان كان فى ناس عندها السكر وغيره ,و اول مادخلو لمبنى السجن كان حبايب قلبى ضباط 8ابريل او زى ما هو مسميهم الضباط الاحرار كانوا بيحيوهم وبيحفزوهم وبيقولهلم ماتخفوش يا ابطال .. ضباط 8ابريل كانوا فى مكان لوحدهم محدش بيدخلهم ولا هما بيخرجوا .. واحشنى اوى ونفسى اشوفهم واخدهم كلهم فى حضنى بحد ان شاء ربنا يفك سجنهم.. المهم شاف ناس جوه السجن محبوسين من يوم 28 يناير وميعرفوش هما هناك ليه ولا هيخرجوا امتى ,عم سيد بيقول ال 1200 مفقودين الثوره فى السجن الحربى. الاكل بقى : الفطار كان فرختين صغار جدا وحبة مكرونه يقرفوا الكلب والعيش كان عجينه دول ياكلوا فيهم 30 واحد اللى يلحق يلحق بقى هو وناس تانيه قعدت يومين من غير اكل ,السحور بقى فهو عباره عن شوية فول ناشف حجر وجبنه محطوطه فى شنطة معفنه والعسكرى بيوزعلهم بإيده ,والمياه مابتجيش غير ساعه واحده فى اليوم تلحق بقى تاخد منها حاجه واللى كانوا بيخدوه زجاجة مياه صغيره تعمل بيها كل حاجه تتوضى وتشرب وتتشطف منها ,بالنسبه بقى لدخول الحمامات عم سيد حجز الحمام من 8 الصبح دخل 4 العصر.وهما جوه بعد اللى شافوه مكانش عندهم امل انهم هيخرجوا تانى غير حبه منهم كانت عندها امل وكانت بطمنهم وتشجيع ضباط8ابريل ليهم والمعتقلين زود عندهم الامل ,وكان المعتقلين اللى موجدين من زمان فى السجن بيدوهم اكلهم ويقولولهم انتوا اللى هتخرجوا وتعرفوا الناس اننا جوه بس اوعى تنسونا لما تخرجوا وضباط 8ابريل الضباط الاحرار بعتولهم زجاجتين تمر الكبيره اوى دى كانوا محضرينهالهم وكمان كانوا بيبعتولهم اكل من الزيارات اللى كانت بتوصلهم . طلعو يوم 3 اغسطس"رمضان" من السجن الحربى ورحلوهم على محكمة عابدين ,المعتقلين وضباط 8ابريل كانوا بيقولولهم ماتنسوناش وبلغوا الناس اننا جوه. صح عم سيد كمان قابل سامبو جوه وقعد معاه.
المهم جابولهم 5عربيات امن مركزى وحطوهم فيها ورحلوهم على محكمة عابدين وهو بيشكر الناس اللى وقفت معاهم وخيلتهم يتحولوا للنيابه العامه بدل النيابه العسكريه. وصلوا حكمة عابدين ولاقوا هناك 50محامى مستنينهم ففرح اوى . كان فى اسامى زياده فى الكشوفات بتاعت النيابه فالنيابه كانت بتسألهم فى حد فيكم اسمه غلط واحنا غير الجيش احنا عايزين نقف معاكم ونساعدكم بس الناس خافت تقول ان فى ناس طلعت من س5 بالواسطه قبل ما يروحوا السجن الحربى اصلا وقالوا ان اسمينا صح ومفهاش حاجه ,المحضر كان هو هو للناس كلها وكيل النيابه ماكانش بيسأل غير على الاسم والعنوان واتمسكت فين وهو يكمل باقى المحضر عشان يخلصهم ويخرجهم والتهم اللى كانت موجهه ليهم واحده هى التعدى على السلطات ورمى المولوتوف دى التهم اللى ثابتها الجيش . المهم النيابه اخلت سبيلهم وهما خارجين جيه لواء داخليه وقالهم ماتخرجوهمش كلهم مره واحده عشان ما ينزلوش مع الناس اللى تحت ويطلعو ع التحرير وزعوهم على 3اقسام قسم عابدين وقسم قصر النيل وقسم الدرب الاحمر . خرجوا من المحكمه وشوافوا الناس اللى كانت مستنياهم بره اللى كانوا بيهتفولهم عم سيد بيقول ان الناس دى نسيتنا كل اللى حصل فينا وانا بشكرهم اوى على وقفتهم معانا. الناس اللى خرجت المحامين خلوهم يعملوا تقارير طبيه عن حالتهم ودلوقت المجلس العسكرى عايز التقارير دى عشان يعدمها. من المواقف والطرائف اللى عم سيد شافها فى السجن الحربى واحد الحمار بتاعه اكل من ارض بتاعت الجيش الراجل اخد 6شهور والحمار سنه وجارى البحث عن الكلب هههههه بيحلف ان ده اللى مكتوب فى الورف وبيقول الجيش مايعرفش يعنى ايه عدل .

 تصوير GhariebUsf@

ودى مدونة شادى عن الموضوع ده ShadyyM@

http://shad-dy.blogspot.com/2011/08/5-1102-1.html

وفى النهايه .. كلمه فى ودنك ياحربيه احنا اللى دغدغنا الداخليه .. وثورتنا على الحكم العسكرى مستمره